خدم آخر زمن

سامعين بكيد الكناين والحموات؟ أكيد... طيب سامعين بمكايد الصناع والخادمات ؟ مش عارفين شو يمكن يطلع منهن قصص وروايات؟ وأذى وقلة حيا ورذالات؟ مش انتو يللي بتجيبوهن لعندكن ع نص البيت؟ قال جابو خادمة نضيفة....لهلوبة بشغلها وآدمية وعفيفة ....وفرحت فيها ست البيت يللي إسمها ظريفة

من الستة الصبح بتبلش تنضيف وغسيل وشطف.... وظريفة وجوزها غرقانين بالنوم ومغطايين باللحف..... حتى إذا فاتت الخادمة عالأوضة فجأة، ما يكون في على عوراتهن كشف

ومع الايام، تعودت عليهن وتعودوا عليها .... حتى صاروا ما ياكلوا إلا من طبخ ايديها. بس هيدي الخادمة سوما أخدت وج وكترت .... وصارت كأنها هي ست البيت وتغيرت طباعها وتبدلت. يا بعدي صارت بتعطر وبتتبودر... وبالبيت بتترقوص وبتتغندر، حتى شكت الست ظريفة بأمرها وصارت تراقبها كأنها سوما الكنة وهي مرت عمها

مرقت الايام وما قدرت ظريفة تعرف السر.... وتعبت من المراقبة وهالخادمة دوقت معلمتها زوم المر. اي ما عادت تشتغل بالبيت إلا دفش ... وصارت تتابع كل مسلسل تركي ومكسيكي وتبرش محطات التلفزيون برش. حالتها ما عادت تنطاق.... وكل ما شكيتها لزوجها شكيب يهدًيها ويقلها عامليها بسياسة مش بخناق. إذا رجًعناها على المكتب بتاكل قتلة وبتتلحوس.... وإذا ردًيناها لعند زوجها بيضربها بيهينها وبتتدعوس. طولي بالك عليها معليش.... عندها ولدين ببلادها ومن معاشها بتعيًشهن وبتعتاش

الست ظريفة وجوزها كل يوم بيروحوا مع بعض عالشغل .... بيوصلها الصبح بطريقو والمسا بترجع معو بدل ما تتبهدل بوسايل النقل. وفي مرة حست ظريفة بارهاق وتعب خلال الدوام ... وطلبت إذن من المدير تا ترجع على بيتها تاخد حبتين بانادول وتنام

وصلت على بيتها وفتحت الباب....ونادت سوما بس ما لقيت منها جواب... توجًهت ظريفة على غرفة النوم وبالكوريدور كانت مرشقة على الأرض قطع التياب .... وروايح العطر معفقة وفايحة .... وصار قلبها يخفق من الخوف وحست حالها دايخة. قربت من غرفة نومها عالمعس ....وصارت تسمع شوية كلام وهمس. يبعتلك حمى يا سوما... وبغرفة نومي هالواطية مش بغرفة نوْما...الظاهر ملفًاية لعندنا صاحبها....بغيابي عن البيت وغيبة معلمها

لحظة....لحظة ....شو هيدي هابيبي مستر.....الله يجيرنا من ساعة الغفلة، الله يستر. تطلًعت ظريفة من شق الباب بطرف عينها.....وعالصدمة سكوا ركابها وما عادو حملوها إجريها. هيدا شكيب بشحمو ولحمو....وسوما الشوكولا مو سايحة ونايحة على جسمو....ظريفة من المشهد نشف دمها وكانت رح توقع بأرضها وتنهار ...إرتبط لسانها وقلبها يصرخ يا مغيث ويا ستار. تراجعت ظريفة لورا خطوة وخطوة عاللس.... وقلبها مولع وبنارها عم تعسً عسً. ومتل ما فاتت على البيت .... رجعت ضهرت عالسكيت

على أقرب قهوة فاتت وطلبت مي... كرعت القنينة كلها وقعدت ترتاح شوي. وصارت المسكينة تحاكي حالها .... وكيف بعد هالسنين بيخونها رجالها. بيعتلك الحمى الشهاقة يا شكيب شوغدار... بتنام معي بالليل وبتخونني بالنهار؟ يبعتك حمى مالطية يا مقطع يا موصل ... ويجيبولي اياك مجلوط وعلى الكتاف محمل

وبلشت تجيبها وتاخدها الأفكار .... وقررت ترد الصاع صاعين لهالأوغاد الأشرار... خاصة لجوزها يللي عامل حالو متل البسين ...وهو من تحت لتحت عم يلدغ متل التعبان. إنو سوما .... الأمور معها محسومة.... علقة سخنة بالمقشة .... وبسفرها دغري وبتحل عنو وعن وشي. أنا رح نفذ الخطة "م" .... ومتل ما ورجَيتي نجوم الضهر يا لئيم .... رح أعمل فيك ضرب وجعو أليم

وكان شكيب مسافر كم يوم بشغل .... هو ودعها من هون ودغري على غرفة سوما بالمقشة حتى تنزل فيها قتل. وبدون مقدمات نسفتها كف على وجها شي تنين رطل.... حشتها من شعرها وبطحتها بالأرض ... وبالمقشة صمتتها بدن بالطول وبالعرض. هابيبي مستر ما هيك يا آفية .... يبعتك مرض وتشحدي بالطريق حافية. قومي انقبري إمشي قدامي ... رح خليكي تعضي صابيعك ندامة

وبيومين سوما على بلدها تسفرت.... وجوزها استقبلها عالمطار.... اي قبرها بإيديها حفرت

رجع شكيب من السفر بسلامتو .... واستقبلتو بشكل كتير عادي مدامتو. استغرب أول ما لاحظ انو سوما مش موجودة .... وسأل ظريفة عنها بسذاجتو المعهودة. قالتلو يي ما عرفت شو صار بغيابك يا رجال .... مرضت سوما وصابتها أوجاع لا عالخاطر ولا عالبال. أخدتها عند الحكيم وطلبلها تحاليل ... ووصفلها مؤقتا دوا مسكن وتحاميل. طلع معها مرض خطير ومعدي بالدم ... قاتولي وما إلو لليوم علاج فشر السم. أخدتها عند كذا إختصاصي .... وبس قالولي معها أيدز ما عاد حملني راسي. سفرتها دغري على بلادها هوا... حزينة خليها تقضي آخر أيامها بين ولادها ويعيشوا يومين سوا

يا معتر يا شكيب، نزل عليه الخبر متل المهدة .... وجمد بأرضو بفرد جمدة .... وتخرسن وانكمد بفرد كمدة. ومن يومها تغيرت أحوالو.... وصدت نفسو عن الأكل من خوفو على حالو.... فقد تقتو بنفسو وصار يخاف من خيالو. بيعرف إنو إذا لاقط من سوما الفيروس رح تكون أيامو معدودة .... وإنو علاقتو بمرتو بتصير خطيرة ونتايجها مش محمودة. وصارت كل ما ظريفة لمستو يزط .... مع إنو الأيدز من اللمس ما بينط .... وصار كل أسبوع يعمل
فحص وعلى طول شارد وحاسس بالذنب وبالنقص. بقي على هالحالة شي شهر ... ونزل وزنو للنص من الرعب والقهر، لحين ما خبرتو ظريفة كل القصة ... وشبًعتو دواعي وعملتلو رصة .... طلبت منو الطلاق وبقلبها حاضرة الحرقة والغصة

وفيكن يا جماعة تتوقعوا الباقي ... أنا من سيرة هالقصة ضاقت خلاقي. وصار فيكن تستخلصو العبر...متل عين الشمس ما بتعصى على النظر. فديروا بالكن يا جماعة منيح منيح ... والباب يللي بيجي منو ريح منسدو ومنستريح، ومش كل مرة بتسلم الجرة ... وانتبهوا على ولادكم كمان، إنتو أوعى منهن وأعلم بالمضرة

هلق رح أترككن ... بس موضوع الخادمات أنا عندي ما انتهى وبقصصهن راجعلكن .... حتى أشرحلكن وفسرلكن ..... وإذا ما بتقروا وبتنشروا يا دلكن